Tagrawla n Tunes d Imazighen nes

***Awal fw awal***

Tegrawl sul Tunes, meqqar tt inn tekka azen gis isardasen[i] ad giddin d imzdaghen, ur dar-sen kra n tewwuri kra ur igin ad dufen midden f ad d ur skaren kra n tewngimt yadn lli d ur yuckin d illi ran ayt tenbadt.

Helli ayt tenbadt ad issen mad irwan i Tunes d midden nes, nettnin ad isawalen s ism n Tunes, i berra d ugwnes, is d Tunes tumez abrid yughwdn s umnid n ubughlu d tenuflayt imil yan umzraw, inigi Bu-uàzizi issuggwa d icimi izzumman n tenbadt n isardasen, issnker d fell-as tewngact n middn, ur tebidd ar lligh teluh tanbadt.

Ha Tunes ilmma tesker tagrawla, da as ttinin tagrawla n ims[ii], urta issen yan ma rad tefek. Issihel agh bahra ad nessen ma rad ig imal n temagit tamazight gh Tunes. Nessen akkw is d tamurt-ad lli gh tezzenzer teghrema n Imazighen zegh zikk.

Nettat agh ttuwska temdint n Kartaj. Nettat ad igan asalul[iii] n Hanibal, alghugh lli ismdurran[iv] Irumiyn, iddu ar imi n tezuznt[v] nesen macc ur sis ikcem, ar lligh fell-as ittuwnna : tessent manik s ar tternut a Hanibal, macc ur tessent manik s ar tesyafut gh ternnawt nek…

Tunes dagh ad gh illa imnghi amqqran lli izubdan[vi] uggar n 200 n ussggwass, ismed lligh nedlen Irumiyn Kartaj lli tt inn ikkan gh uzmez ann tega yat g temdinin n tussna, zund Bariz ghw ass-ad.

Tamurt-ad ad gh skan Imazighen imslmen tamdint n Qayrawan ngh tin ikrwan, mek lli inna yan umzraw…

Tunes ilmma ad gh ttenyakcam tussna n Temazight d tussniwin yadn n umadal.

Ass-ad tereca temazight gh Tunes, acku tanbadt n isardasen n Ben Àli d wi-lli t zwarnin ruren tt f usga.

Ass-ad lligh tella tegrawla, is rad d-terar Temazight addur nes gh Tunes ? Netter ad yili mek-ann. Tunes llan gis imghnasen imazighen. Zedaren ass-ad ad sresen issuturen nesen, skeren timsmunin ngh ikabaren isrtanen lli rad immagh f temagit Tamazight n Tunes.

---

[i] Policiers.

[ii] Jasmin.

[iii] Lieu de naissance.

[iv] Écrasé.

[v] Capitale

[vi] A duré.

** Yur a tt Dda Muh Akunad**

Ad yyi bahra isuref igh gis nfelegh kra n teghawsiwin