Tamaynut : uhu nit iqqurn iw uzref amuqqran

Isker, gh ass-ad, igiwer anamur n temsumnt Tamaynut gh tenghramt n Inzggan anmuqqar nes amkkattu.

Awttas nes iga t ad isawel f ustsen n Temndawt tamaynut lli rad tedi tenbadt n temazirt gh umzwaru n yulyuz d-yuckan.

Tayafut lli s d-ffaghen imawasen imaynuten iga t masdd tamagrawt nesen is teghera s ubrrah igamamen nes d imarayen nes d ayt temazirt akkw ad azumen f ustsen lli d-ikkan agharas.

Acku, mek-lli ittyuran gh ussisfiw lli d-tedi, asnfar amndwan ur ifaw gh kkuz udmawen d ur ifeka kra n udwas is rad as ttukkas tillas lligh immuttel.

Imazighen n Facebook ullen awal

Azawar lli inna Ben Kiran f timmuzgha inzel-d i yat taddinga meqqurn n tegudi gh Internet. Igamamen Imazighen n Facebook sbedden mennawt n tenfulin lligh ar gis rggemen amasay n Ukabar n teghdemt d tegmi. Is akkw gis lkemen tamjiyyert d temzzarrut. Uggar, wiyyad, nettenin, gan-d akkw tiwlafin n Ben Kiran lligh t swwurden. Ili akkw, netta, ma(d) gis iskern ilef.

Ben kiran icid-nn gh Imazighen

Ben Kiran, anflus meqqurn n ukabar n teghdemt d tigmi, lli bahra ittussann ghar s PJD, isawl id-gam gh yan unmuqqar agudadan lli ittuskarn gh Tezunt n Temazirt f temazight d tirra nes, tifinnagh.

Mad iggutn n medden unnin-nn gh iwaliwen nes timitar n unxxel d ussimziy lli ihda i Imazighen d Timmuzgha.

Tamullit Tamazight n Izerfan n ufgan tedi-d yan ussisfiw lligh bahra teziwer Ben Kiran ura gar iwaliwen lli d gis iffaghen.

Igamamen imazighen n Facebook ur fissen, ura nettenin. Is akkw ar ttehiyyalen yan ubeddad n tegudi gh umnid n tezdught n ukabar n Ben Kiran gh tuzzumt n Rrbat.

Ad awen d-nesskwti masdd akabar ann gis mad iggutn n Imazighen lli bahra ssenen medden, zund Ddawdi, Àuthmani…...

Inghmisen sw awal n Umazigh

Menckk a(y)-ad ar ukan swingimegh ad rzemegh yan uwr gh Internet ad d gis teggagh, takklit s tayyad, imagraden n ighmisen n temazirt ura berra.

Awttas inu amzwaru igat ad mmaghegh d-ssgrugh yan w anaw gh umjrred anghmas lli ta ur illin ghw awal negh. Acku mek-lli akkw tessenm, hati hawlen as issggwassen d issggwassen n usimi, ussimziy d unxxel dar ayt dar-negh nit igh ta ur iga dar ighnan n Imazighen d timmuzgha.

Yat ukan, rad mmaghegh s illi mu ufigh fadd ad fekegh imikk n taghamt inu gh ubaraz-ad. Meqqar bahra dar-i ur tella tizi iggutn. Ukan gh man zund tawwuri-ad ar bedda ittefulki ad gen ifassen mnnaw. Acku ar ttiri ur-d ghar tirit, tiwisi ura nettat. Hayy-agh rad nebedd, ad ibedd Rebbi gh tama nu !

Lahsen Ulhadj