*** Asggru gh teskla***
Issyafa masdd is tusin w aman. Is rad gis ikk afuss, nettan, d ayt taddart nes d mad akkw ittaf. Ulli d izgaren nes, ar fttun. Tagrurt nes, ar tteyakar. Turtit nes, kkanen-nn dar-s id wacc. Ura ighwrban n tegemmi nes, ar ttummalen ad gisen ghwlin, zerin ten-inn akkw.
Gh tillas bbwknin ar akal, illa kra ur ifaw i titt mad iga. Itteres gh iggi n uzur n uxdayc nes.Ur sul yufa ad izzider i tekni d ufessas. Ur ad sul ikwmmec d ixf nes zund ifker. Igh iggawr mek-ann rad-d ilqqem uggar i temmukrist nes. « Yuda, hiyya yuda ! », as inna d ixf nes.
Ad ka awin imzgan nes tiskkal n idarren d ifnza tekkanin tigemmi gh taqqaqt n tillas, ar d gis tenkker teghufi, ad nn-irar gar fw ayda nes. Yamez yat tazert, tasi tuwtemt nes agelzzim, ar fttun f tefdenin nesen. Ffeghen ur ar ttemniden awd hah, igh ur iga tifssas ghzzifnin lli itterezza uzwu d usmmass n taddagin lli asen issutelen d ibbandriwen n id lli-d ittawin uggar n tekssad lligh yad llan.
-Mani s a wa ka idda gar aydi-ad negh ? Maxx lligh a(r) ur ittagh mek-lli t ?
Ar ttexmmimen d ixfawen nesen s tegrezawt. S idudan bukdnin, ikwna sw akal ar ittegger i kra. Imil yamez yat teghawsa iqqurn awd kra n uzru ma s ann ikkat tuggugt lli d-ikka w imsli[i]-ann. Ma zza issen ! Zund amya rad ruren felent-id gh ufra netta d tawja nes.
Macc, immaqqar ufuss nes d kra igan zund arkti[ii] ilggwaghn, immulzn. Itteghwi as d gh idudan. Irzem i tezamma d tujjut itterran unfus zund kra n midrus. Iqqes urgaz lli i teghuyyit :
-Menckk n tikkal ad awen nnigh, a gar tarwa, ad sul ghid ur teskarem izumaz, ar ttalesem mmel[iii] nna tufam zund ifullusen !
Ghlin as bahra idammen. Ar ittesis. Ar itteberbur. Ar d-tteffaghen gar iwaliwen d inna-d yiwi imi nes s taqqurt :
-Id wacc gh berra d texandallasin gh ugwnes, hakk a wa hakk ! Ar agh d ka sul lkkemen !
Lligh d-ttebbaqqi tifawt w ass, ufan-d aydi lli nesen iga afkka yuffn, kkuttin gis idarren. Ili gh tama nes yan ugzzum n uksum izzghwrn s kra idlan. Ssenen ilmma mad nn-ibbin tasa nes. Ur sul intel umya i urgaz d lall nes. Illa mad ten iccukkan, yiri ad as isker ma s iggwra w aydi-ad nesen.
Izeri-nn ghay-ad tukkerda n ulli d teghawsiwin n taddart d usggwtat n tarwa. Tteyarant tekssad ggutnin gh udm n umghar n taddart zund igh as immuttel uzayz. Ismmass may-ann infuren nes hdanin timitar n ughulif iggutn.
Ini ilmma ayyis nes ass-ann nit sul. Inzel i tesudut nes, imel-d tiqqar i teghremt nes. Ifel-d yat tegdrurt zund mek-lli teskar tanawt w aggu fw aman. Ar t ittilih imikk s imikk ghw afa izdin dw aman. Tesslkemt tanaka nes s dar tarwa n id dadda-s lli llanin gh yan w ansa lligh lluzzant takatin d kigan n texamin i igwmmaden idfaren aman d ulmu zgzawn.
Is ten inn ka ilkem, yakwi-nn ger ifassen nesen, ar asen ittales mad disen izzeri gh uzmez aqqbur d ussan zerinin lligh a(r) sul d isn ittemun. Ussan n n temzayt d teàurma d umdur ighudan. Srsen as d izammaren nwanin f takat d igdduten[iv] w atay n temijja[v] f tekka terzzat tamellat.
Lligh nn udden i laz, ssneden f tuddixfin[vi], gin-nn taghnnant gh usskwtay n umarg d temdyazin d inghmisen ssilinin taysi n tizzla d umzruy n immudduten gh temizar aggugnin, tawdiwin d ighwzniwen lli gisent.
Macc ur t akkw ujjan s isqqsiten. Ffreghen as tent ar lligh d fell-as rkesen : « Manik ad nn-gan ayt ighrem nnun? Is sul ghaman ixrubban n ayt flan gh udghar n ? Is ad sul ttawint tamdiwin aman d tujjutin n ifskan[vii] d tuga?... »
Bbaqqint tadsiwin munnin d tadfi n tissi w atay sw awal zund asbuxrur n ittes.
Yales asen f mad as d-igan idarren d uzziwir d imakren n tillas. Kra n medden ur lanin timitar ura udmawen lli iran ad as skeren tin ubzeg igh d issutel f ufuss[viii].
Raren as d ayt ugdud-ann : «Ur nega gh wi-illi ssusunin akal gh telmsa igh nkeren, a(y) iwi-s n dadda-t-negh ; taddarin nek, tigumma negh ad gant.»
Issuda akitar nes yaghul s tegemmi. Kkent fell-as temitar n tefssas ur tent ibbi ghar ishunhun w ayyis. Ibbi tizzla zund ira kra n tammaght f ikka ugdrur. Gh tuggugt, iwint as d w allen nes tigwumma lligh d-yuda zund kra iskkilen tteyaranin iggi n kra n teflut lli s aqqran inalmaden d imhdaren gh uxwrbic n temzgida. Ikcem kra gh kra, ur nmilin zund igh inxabbalen izakaren. Ur tessent ixf gh idarren nesen.
Illa fell-as ad nn-irar gar f ixf nes s ixf nes. Ishiyyel tamghart d tarwa nes s mad d-yuckan. Issdus ulli d imudar nes. Yasi-d aburi ig as sasbu. Ibkes s taggwst nes. Ikfed, idiyyec, ar itteqqel s tillas ad as derent, d man akud ar ad d-akwin id wacc lli t ur yujjan gh tiqqar nes.
Tamghart, s tefessi n temucca, ar ttakkwr assflid, ar tekkat afaten gh tillas.
Had kra n tewada tesfal ar d-ittaz imsli nes zund izuran n gar tuga. S yat tekkelit, ar kkaten ulawen, tebedd-d nit yat temdlut iggutn gh tillas. Utten-d kra n usman sdidnin zund kra uzzir ikka wargiga d yan iggig ifssusn iwin t id imzgan gh tuggugt.
Iffrttel urgaz, teccukkut tad ila s tikni. Skeren amnid n kra n teghwmmirin lli yad-lli gan gh ixfawen nesen.
Ufan-nn iguyya nesen gh berra n taddart. Argaz ildi-d tasdda imdi tt id. Temun dis temttudt nes, uhu is tehda gh teghwrdin nes. Ffaghen gh kra iqqen amnid nesen. Isgjdi gh tama nesen zund kra n udrar ibeddn. Ila tifraz zurnin gh udm nes zund igh ittuskar gh ughulid. Imikk ad deren s akal s tezlagt lli ten yusin.
Gh akud-ann ad isniyyec urgaz tasdda nes s murran-ann. Teffagh teblalt[ix] tesbbaqqi afessas lli issutln i udghar-ann. Isccukku as d tayyad. Mmrkesen ibaqqayen n teblalin d iggig. Sllan i mad ibeddn amnid nesen ar lligh nn-irrumma, temun dis yat teghuyyit d iffaghn gh udis n tillas. Iga id w ass-ann zund argaz nna mu ibbi uhlig nes. Urrin tigira, akwin s ugwnes n ughgwmmi lligh d-uckan. Qqenen-d taggurt sw asad.
Argaz ider as ils, inna i temghart nes s kra n bezziz :
-Uff, nesker tt sul gis, irwas is d wa-lli meqqurn ay-ann !
Terar as d temghart s yan udm ffaghn idammen d teguriwin irkesn d tumert d tekssad.
-Menckk as ideni ufkka nes ! Izedar ad ur ig afgan.
-Iga ten akkw ghas afgan. Ass-ad, rad bbint tawdiwin negh, ur sar sul nettggwtat.
-Macc illi mu nesella d tewada ur nnigh tega tin n yan urgaz ?
-Irwas is rwulen ismmunen nes, lligh-t zeran ider akal. Ksudegh ukan ad d-aghulen azekka ad agh raren mad nesker gh umghar nesen.
Ini as s terrugza d tegizult, ibbi ttemi i mad ittebrramn gh ixf nesen:
-Ur ad neffagh tigwmma negh s inna illan.
-Waxxa nn sis nuggwa, ad nezer timitar n udm nes. Mmhninesegh ad zeregh tafgga nes !
-Uhuy a tamghart ! Izedar ad itteyagas nghedd ad yili kra n yan gh tama nes. Ajj agh ar kigh d tuggwa tifawt .
- Ar ttannayegh is rad ur aggwint tifawin n taylgi ass-ad.
Tterrmesen gh uwr nesen ar tteqqelen s filfukt ad d-yaggw. Iwin ten imjijjiwen s kra igat mani. Msseqqen yat gar tigira i murran-ann gh usarag n tegemmi nesen, manik as rad nn luhen afkka nes gh tuggugt, manikk rad ig umdel nes nghedd ajdar. Nghedd ad akkw bbin ixf nes, agwlen t gh kra n taddagt ad ig tamatart i wa-nna iffaghn ixf nes ar nn sisen ishawza.
Lligh tella tebbelbest, sllan i igdad n tifawt. Iffagh urgaz, diyycen inzaden nes, ur-ta jju ingara d uburi nes ad nn ur yaf mad nn ur itam. Ibedd tama n ungis nes ikremn. Icbeh gis aga. Ur ukan ifles mad skeren ifassen nes. Yamez ixf nes. Yall afuss, yutt sis wayyad yini :
-Manikk as iffagh ghwa-ann ixfawen negh ?
Telkem t inn temghart nes derent as sat aman. Tini as s tegrezawt :
-Ad ur teqqelt s ughrum gh ass-ad a(y) iwi-s n Bexxa ! Teffught, a wacc n id wacc, gh ufarnu n tallaght negh. Is t akkw tessfit a(y) argaz d uzgen !
[viii] Lui jouer un mauvais tour.
[ix] Balle de plomb.
Tallast-ad yura tt Àbdellah Amennou
