***Awal fw awal***
Sdis iyyiren ghezzifnin ad kkan irugiyen[i] d imcirriyen[ii] n Libya mmaghen d ihuttilen n igumiyen[iii] n Qaddafi, lli s ttessenem ngeden ar imi gh kra igat anaw n ikrraden[iv], ad as kkisen algamu n izmawen lligh ibbwk izuran kkuz imrawen n issggwassen ay-ad. Macc iqqan-d ad nessen s yat teghawsa : mladd is d ur aqqeryal d takat zegzawn lli as ffreghent, ku ass nna d-iga Rebbi, kra igat anaw n taylalin n NATO, ur nnigh tawwuri n ussinef[v] n Qaddafi d tarwa nes rad tili ttemi. Acku iggut mad dis illan n medden. Is d akkw yiwi wiyyad lli ssghwni[vi] s iqqariden gh temizar lli as ssuttelnin.
Macc awal n tiddt iqqan-d ad t ini yan sul yales as. Igh itteghwin ayt w ayrni[vii] n Iming gh tesggwin n Briga, ggammin ad s tt nn-zerin, ghw ayrni n tagut, tighawsiwin mnahyant. Acku Imazighen Infusen bedden tubedda n yan urgaz, kcemen s Qaddafi ar anwal, sul zzunen-nn gis acnyal Amazigh. Ur nesghawsa ad nini, acku inagan zeran akkw sul sfleden, masdd is ssunfen akkw inggwa nesen f usga, melin tagizult mek-lli s tella sul d uggwar.
Is akkw ufigh ad inigh mladd is d ur netteni, addad isaddumn ul ura tasa n ku yan rad sul ighama zund-zund. S teguri yadn, anafal lli igan Qaddafi d ibughagh lli gan tarwa nes rad ukan sul ssenbaden[viii] s gar d uzddim[ix] -Rebbi kad dagh issen menckk !- gh tuzzumt n Terablus, sul ar tteffin ihaburen d ihatan f medden n Libya ura sul win umadal. Macc, mek-lli akkw ssenen medden, kra igat taghawsa tela ttemi gh tudert-ad. Tattwalt n Qaddafi, lli igan yan udiktatur iffin maydd d idammen, ad as tt innan. Surf at yyi igh nnigh yan w awal ! Ad t id ur irar, netta, ura mad igan amud nes marra !
Sawl at agh ghil-ad f Imazighen d uzekka nesen gh Libya tamaynut ! Irwas yyi is nn akkw tuttem sw allen nnun f usnfar n temndawt lli d-idi usggiwr anmattay n Libya[x]. Assnseb[xi] n tuttlayt Tamazight ur gis ill ura yaz t inn. Uggar, yan gh igwmamen[xii] meqqurnin nes, lligh ziyyeren Imazighen f udm-ad n taysi nes, inker issreh asen tamzzarrut d temjjiyyert ur-ta (y) akkw zwan idammen n imttinen[xiii] nesen gh akkw tesggwin n Tagut n Libya. May-ann ad yiwin i yan umara yan w awal lligh inna : ‘’Gh kra igat ggu Libya ihda gis yan Qaddafi’’.
Yat ukan, hati ur d Qaddafi ad iceqqan ad t nn-yitti, tidyulujit tafacist n teàrubit lli sul gh felsen tuggwt n medden gh Libya ad ur ilin ijji ura asafar. Ghay-ann as ixessa Imazighen ad bedda gen yan ufuss, dulen ad asen ur skaren ighnanen[xiv] nesen timlillay, skerent dagh gisen. Macc, igh nunni taytti d turmt lli melan i umadal marra, ur nnigh rad ten sul ixtel kra n yan. Ini as ad ig ur ssnegh mit. Qqel at agh ilmma nezer…
