Powered By Blogger

jeudi 16 juillet 2015

Janbiyyi : talγat n tasut

I yiman n Σmmuṛi  Mbaṛk

Talγat n “Janbiyyi” lli yura igllin n dda Σli Azayku, tili γ twckint n tmdyazin “Timitar”, tssn yan umurs ur ilin anaw γ yigr n uẓawan d umarg amaziγ. Amurs ad iska f kṛaḍt trsal. Ku tirslt teṭṭaf tindi srs iẓlin d tmssutlin lli as ibṛṛmn. Γikad af rad nsawl γ tnfult ad f kṛaḍ iswirn lli iwsnin γ usussn n tlγat ad.

Talalit n tlγat

Kigan d ihwawiyn lli ssfldnin i  tlγat ad γ ugṛḍ n Σmmuṛi  Mbaṛk  nγd imγritn lli tt γranin γ udlis n “Timitar”, iẓḍaṛ ad darsn ur tili  kra n tannayt f uzmz d tmamkt lli s ttyura. Tga talγat ad zun d ukan kra n tslma: tlul d γ Fanṣa γ gr imzwag n Ayt Ṣwab (ayt dars n Bṛahim Axyyaḍ) γ usggʷas n 1969. Isgmu tt uzayku γ gr tfrin n “Timitar”, issngf tt Σmmuṛi γ unmuggar anamur n tzlit tartart γ yiγrm n Lmuḥmmadiya γ usggʷas n 1986. Ussan lli nn izzri  umdyaz Azayku d umddakkʷl nns Bṛahim Axyyaḍ dar imzwag isusiyn γ tuddurt n Janbiyyi gan ussan lli γ nn yukʷz  Uzayku addad lli γ ddrn mddn ann, aggugn gis tawjiwin nnsn d wakal nnsn. Ad igan tidt, Azayku ur d γ inn yucki aylliγ d gis yiwi talγat ad tamγlalt.  Tiguriwin nns usint kigan f tassast d tcaga n imzwag ann lli usinin tiguḍiwin γ ulawn d lli gis ur imyarn, ar ttqqln s yan wass ad d yack ad gis tssus Janbiyyi amdlu, taggʷ d tafukt lli tn yurun.

Amdyaz dda Σli Ṣadqi Azakyu

Tizrawin lli ittawskarn f tmdyazt tamaziγt ar asra ad, ar ttinint mas iga Uzayku yan umdyaz atrar. Iga amzwaru lli isgrawln anagraw n tlalayt n umarg amaziγ iẓlin s yiffus n tmazirt nnγ. Timdyazin nns gant amdya n yat trmit tatrat γ yigr n tskla tamaziγt. Tirmit lli f tska yat tinml ismunn kigan d umḥḍaṛ, ddun γ ubrid n Uzayku, am Wagrar d wiyyaḍ...

Ifka Σli Ṣadqi kigan i tskla d tussna tamaziγt, isawl f tufrayin, indr inzgumn, isγuyy f iskraf, yiwc i tguri atig, ifk tilelli  i iswingimn nns...  

Talγat n Janbiyyi tga yan umdya γ tmdyazin nns ggutnin.  Taγarast lli s tt yura,  tiguriwin lli as isti,  inumak lli tusi d isqqal lli γ tettawstal, ujjan tt ad tg yat tmdyazt yaḍfutn d tifsus γ yils. Issimim tt uggar Σmmuṛi  Mbaṛk  lli tt isslkmn i umaḍal, ifk as yat tnaγa d yat tufrayt d isawaln γ ugʷns n wul…
Talγat ad, tsnfl udm n tzlit tamaziγt, tiklit zwarn rad tettwafka tmlda i tmaziγt ad tturar s tγarast  tamaynut, ig unaẓuṛ amaziγ amγar n trabbut tamẓẓawant tatrat.

Σmmuṛi  Mbaṛk , anaẓuṛ amẓẓawan d izwarn tasut nns

Issnti Σmmuṛi  Mbaṛk  amarg zγ mẓẓiy nns, ifk ugṛḍ nns tiguriwin mmimnin i imsflidn d ugdud nns. Iswwuri s kigan n tzlitin iγman γ tskla tamaziγt tatrart. Mqqar ittawssan Σmmuṛi s uẓawan amaynu, amarg aqbur ur gis ifl. Tisfifin n ṛṛayṣ Lḥajj Blεid lli mi yuls γ isggʷasn n (90) s tmlda n usnfar lli tssnti tmawast n tussna bla tsmd t, gant tuggʷa mas yiws unaẓuṛ ad γ usmatti n talγatin ad s dar tasutin n yimal.

Mnnawt tfras ad idra Σmmuṛi  d Uzayku: ar akkʷ ttirin tizlit tatrart, d usin akkʷ unzgum n umarg amaziγ d usbuγlu nns. Inna Σmmuṛi  γ yan umsawl mas ar nn ittafa ixf nns γ tmdyazin n Uzayku. Yufa gisnt aylli s ar isiggil : taguri immimn, talγiwin yusin ur d imikk n intagn γ uswir amaḍlan ddfir n win tmazirt.

Talγatin n Uzayku lli yurar Σmmuṛi  ggutnt, gant akkʷ tin tmaziγt zqqaγn, teṭṭaynt tiguriwin timzzitin, fkint tindi i wawal amaziγ zun d  tizlit n “Janbiyyi” lli igan  talγat tamγlalt γ umzruy n umarag amaziγ atrar. Tẓḍaṛ ad tsnfl addad n tzlit tamaziγt s yan waddad lli tt yujjan ad nn tut s wayyawn nns γ yigr amaḍlan.

Σmmuṛi inna γ unγmis n « le Matin 2003 » f ulmuggar anamur n tzlit tartart -lli γ yiwi tasmγurt tamzwarut-  mas iga yat tmlda lli γ ar ittnmiggir yan ugdud n inaẓuṛn. Tiklit zwarn isyafa gis s uẓawan, s uḍṛiṣ n tlγat, s wul nns yuyl ar ittirir: « myarγ adlli ad didi ittirir γ trabbut inu smmus ar ṣḍiṣ n mddn ; γ tlγat ad, urarγ gis d uggʷar n 30 n ugmam amẓẓawan… »

Tannayt ad lli ifka Σmmuṛi  tẓli s unmuggar anamur n tzlit tartart, macc mad iẓlin s tlγat n «janbiyyi », inna fllas γ usays n « في البال أغنية » tiguriwin ad : « ufiγ nn  γ tzlit n janbiyyi aylli s ar siggilγ. Timdyazin n Uzayku gan zun d iγ ar tnt fllati ittara, ar nn gisnt ttafaγ ixf inu ; lliγ stiγ talγat ad,  giγ γ ixf inu yat twngimt : ad d gis ḍiγ yat tnaγa nna ur illan γ tsfifin inu timzwura. Asqsi iga t: manik s rad skrγ abṭṭu amẓẓawan nns d manik s rad tt ssnkdγ i ugdud, awiγ taγḍft nns… ayad akkʷ tamγ t inn γ tzlit ad».

Mqqar tlla tγnnant ngr inaẓuṛn imadrawn γ unmugar ad, tẓḍaṛ tlγat n “Janbiyyi” ad tawi tasmγurt tamzwarut n tzlit tanamurt tatrart ; aylli yakkan tamatart mas tẓḍaṛ tmaziγt ad tskr adγar nns γ yigr n umarg anamur, macc ad tili tnalit n wawnk, acku nttat ad iẓḍaṛn ad  tsslkm aẓawan amaziγ i tskʷfal attuynin γ uswir anamur nγ amaḍlan.

S uzgzl talγat n ‘’Janbiyyi ‘’ munn gis ifrdisn ad lli tt yujjan ad tg talγat n tasut :
-         -Yura tt Uzayku, amara axatar, s yat tγarast tatrart γ yat tizi lliγ sul ijbbṛ umarg amaziγ γ tγarast nns tamyurant;
-         - Ismurg tt Σmmuṛi  s yan ugṛḍ iḥlan d yat taqqayt d iṭṭayn tufrayin n wul;
-          -Abṭṭu n uẓawan nns iskr t unaẓuṛ Ḥmad Σinun;
-         - Tska f tguri immimn yusin anzgum d tkrrayt n imzwag ayt darnγ γ tagut n Bariz “Gennevilliers”;
-          -Tsdandi tt trabbut tatrat n uẓawan lli iḍfaṛn i tmawast n tussna;
-          ....
Tasmγurt lli yiwi Σmmuṛi s tlγat n “Janbiyyi” tga γar yat γ gr tsmγurin yaḍnin. Talγat n “Janbiyyi” tga yat γ gr tmdyazin yaḍnin. Talγat lli f nmaggarn sin inmγurn: yan γ yigr n uẓawan, wiss sin γ yigr n tmdyazt tartart.

Xalid u Blla 



samedi 25 avril 2015

Xalifi: '' Addad amiran n tsekla tamaziɣt s umata atan la yettgerriz''


Mhenni Xalifi iga yan γ iԑrrimen lli yusin anzgum n Temziγt γ temurt n Iwzawen (Lqqbyal). Isffaγ-d ussan-ad yan ungal bahra ifulkin lli mu iga s wassaγ, Asdawan. Nennalkem d-is fadd ad d-is nesker amsiwal-ad. Γer at aγ ma rad aγ yinu n turemt nnes d umuddu nnes γ tirra s Temaziγt!


Γ umzawru, ini aɣ mad tegit (d anwa-k) ?
Semman-iyi Mhenni seg twacult n Dexla Ɛli neɣ Xalifi. D amaru-amedyaz ilemẓi i iwalan tikkelt tamenzut tafat 25 n yiseggasen yakan ɣer deffir, deg tɣiwant n Ayt Smaɛel, aɣir n Bgayet.
Maxx tirra (acuɣer tira)?
Acku tazwara, akken i neẓra akk, tira d assaɣ i yessawaḍen amdan seg wannar n tinnuzɣa (ignorance) d tewreɣrit (analphabétisme) ɣer win n cwiṭ n tmussni. Syin ɣer-s, tira ɣur-i d tamdakkelt ifazzen ukud ur zmireɣ ad msebḍiɣ. Ay acḥal i yecbeḥ wass-n asmi i yi-d-yeɛreḍ umru, akken qqareɣ deg yiwen n usefru, ad d-nawi abrid idumen lwaḥi. Aya yeḍra-d mi lliɣ d anubi.
Maxx tirra s temaziɣt? Nekk ɣur-i walaɣ-d seg tesga nniḍen asteqsi-ya am tenniḍ-iyi-d: acuɣer triḍ ad tiliḍ d kečč. Ihi tira s tmaziɣt, s tezwawt, d asusru kan n yiman-iw. Ahat send ad d-ɣliɣ seg uɛebbuḍ n yemma selleɣ-as i tutlayt-a n wid yeggulen ur ɣlin d tisuta tura, tessawal-iyi-d zzedmareɣ-as. Ihi tira-ya s tmaziɣt d tillit kan d nekkini.
Is d ungal nnek amzwaru ay-ad neɣ uhu?
Ih, Asdawan d ungal-iw amezwaru. D asetni n tira ideg yezmer ad yaf yimeɣri asdukkel n ddeqs n tlufa i yerzan Asdawan n tmurt d umdan s umata.
Man ammukris (taluft) ad tufit lliɣ a ttarat ?
Ad d-iniɣ ttmagareɣ-d tikwal uguren, ur iɣilifen. Uguren-a mačči n usenfali neɣ n lebɣi neɣ n kra nniḍen. Maca rzan kan amawal ussnan i werɛad nqeɛɛed neɣ d-nerra yella deg tutlayt-nneɣ. Yettusemma ttrasen-d wuguren-a deg ubrid-iw mara xseɣ ad ɛnuɣ aḍris deg tnuḥ tussna. Amedya am les gènes, la cosmologie, l'ésotérisme, d waṭas n wawalen nniḍen. Maca ur iyi-sseḥbasen wuguren-a imi i tt-ferruɣ s unadi neɣ akken nniḍen: ad d-mlileɣ ugur ad t-kkseɣ ad ɛeddiɣ.
Amek s a tannayt addad n teskla tamaziɣt ?
Addad amiran n tsekla tamaziɣt s umata atan la yettgerriz, yettnerni. Yewwi-d kan ad nernu ad nessečč tasekla-ya akken ad tegmu, ad temɣur ugar. Annect-a, s tmuɣli-w nekkini, ad yili ma nesnulfa-d nerna nesnulfa-d isental nniḍen imaynuten deg tira, wamma iɣaniben ẓriɣ llan yilemẓiyen i tt-yettselliken aṭas deg ukayad-a.

mercredi 18 mars 2015

Aruhal : ''Tamɣart Tamaziɣt tga bdda lal n usnflul"


Xadija Aruhal yat tega ɣ twutmin lli ganin tiwwa s ay-lli mu ufant i Temaziɣt d timmuzaɣa ar d gis sggruntt ɣ kra n wanaw n tskla. Gallnt ur sar d awal nnɣ ad ittggʷizn akal. Is t akkʷ t ullnt ay-lliɣ ilkem ay-lli d jju ur ikka. Rad iniɣ sul alsɣ as, ad aɣ akkʷ yasi anzgum n Temaziɣt ad tafuḍ kra n wass. Uggar, is akkʷ rad sul skarnt tamssirdt i iɣnan lli aɣ iḥacan. A wa dd sul bahra ur nttqqel, ɣr at aɣ ma rad aɣ tini ɣ umsiwal lli yuklaln tiɣri sul d uggar! 


Ɣ umzwaru, ini  aɣ zwar mad tegit !

Ɣ umzwaru, ar k snimmirɣ xf tuggas lli nn bdda tggat  xf ad tlkm Tmaziɣt aswir nns mqqar tswwurit ɣ umalu, macc tawwuri nnk tga addur ixatrn i tskla ula tawssna Tamaziɣt. Tanmmirt f umsawal-ad lliɣ didi tdrut aswingm. Ar ssitimɣ ad lkmn inumak nns illi s iqqan. Nkki, Xadija Aruhal,yat tmɣart lliɣ izdɣ ufrak  s tmagit, tsti ad tzdi tudrt nns d umawal  n tutlayt nns, ar ttara   afadd  ad  tsslkm aswingm nns, tssifsus srs anzgum, tsunfu gis.  Nkki giɣ yat ɣ istis n Sus, taqqblit n Ayt Baɛmran lli iwalan il. Tamazirt inu Mirleft, lulɣ gis, imɣurɣ gis, ɣrɣ gis, ttihlɣ yan ɣ tarwa nns.

 Manik   ad  teskert ay-lliɣ tekcemt abaraz-ad n teɣnesa Tamaziɣt ?

Ɣ umzwaru, kkiɣ  tt inn zud akkʷ azzann n tmazirt, ɣalɣ  bdda is akkʷ  ssnn middn Tamaziɣt s umata, is akkʷ nga yan ɣ wamur-ad, macc lliɣ lkmɣ tizi n tɣri, fawɣ is llan kra  n middn ɣ wamur  nnɣ ur gin  zud  nkkni, dar-sn  ils yaḍn, tutlayt  yaḍn  lli s ur zḍaṛɣ  azmz-ann ad s-tt rmsɣ macc  ɣalɣ  is aɣ  ufn, is aɣ  zrin, is gan  yan  wanaw n ufgan  lli  issn  ay-lli ur nssn  slawann  akkʷ  lliɣ   gan  nttnin  islmadn   ɣ  tmazirt  nnɣ, gn  gis   imsgnafn,  ng nkkni  inlmadn,  ng  imuḍan  lli  srsn    isɣawsan   ad    aɣ  akkan  asafar, mln   aɣ   tifawt. Kr  as azrayn    ussan  ar  ttimɣurɣ   ar  ffrkɣ is nga   yan   acku  kra  iga t ass ar  iyi  immal ma s kra n yan   gisn   dar-s   yan   ɣ  tawja  nns   iga  zud  nnɣ   awd   nttan  Amaziɣ. Ay-lliɣ   ilmma  frkɣ is tn  kullu  gan is ka  snfln  awal, lsn  timlsit  yaḍn, fln tinsn. Macc tikklit  tamzwarut  ad  frkɣ  iga  tt  lliɣ  ssnɣ is tla  tutlayt   nnɣ   askkil   ɣ   usggʷas n 1993. Ikkatt   inn  dar-i  yan  ɣ aytma illa ɣ  umussu  adlsan, afɣ  dar-s  iskkiln n tfinaɣ, lmdɣ tn waḥdayyi, mmaɣeɣ  ad srsn  ttaraɣ  acku  ḥmlɣ ad-lli   ad   ttaraɣ    kra n igzman s tutlayt n taɛrabt.Yan wass   uriɣ   yat  ɣ  tmdyazin  n gʷma  lli  irir  ɣ  tssfift   nns, skrɣ as amawal   awiɣ tt s usinan  lliɣ   aqqraɣ, nniɣ  ad  skrɣ tanatamt  i  imddukkal   inu, skrɣ   tt   i  islmadn  inu, mmrɣ  bahra   acku  iwiɣ-d kra  igan   amaynu   lli  ur  issn   yan. Ssyafaɣ s yan  uddur  mqqurn, agʷlɣtt inn ɣ gr tnfulin  lli  srsn   inlmadn  ɣ   uɣrab n usinan, qqlɣ s tmrarutin, ikk  wakud   yat  tizi, iɣr  iyi   yan  uslmad inna iyi masd   asinan   iga   adɣar n tɣri  ur d  iqqan  ad gis gɣ may-an zzeɣ tizi-an ad ssyafaɣ s naḥya. Zzeɣ ass-ann ad usiɣ  yat   tgallit f ixf   inu as ar   usiɣ   tutlayt  ad  f umggṛḍ, fkɣ as tudrt inu. May-ad ad igan  azakak   lli   iyi  yujjan   ad   frkɣ s uswir, frkɣ s unzgum, frkɣ s tmmukrisin d naḥya d may-an ad iyi   yujjan   ad   ttaraɣ s tutlayt  nnɣ .

D ma kem yiwin s teɣarast n usnflul d s usggʷruɣ teskla Tamaziɣt ?

Asnflul iga yan umaḍal n usunfu lliɣ tzḍaṛt ad tddrt ɣ waddad nna trit d s mk-lli trit. Nkki lliɣ a ttaraɣ ufiɣ-nn ixf inu ɣ wallas. Tawwuri izwarn skrɣ tt tgatt tullist lli s iwiɣ tasmɣurt n usflul lli tskr tbadut n 2m ɣ uysggʷas n 2008, macc ar bdda ttarraɣ izlan. Nttni ar bahra gisn tssunfuɣ d ar gisn ttili yat tamimt naḥya tt slawann akkʷ iɣ gisn tlla twllaft, ili gis udinan. May-an af uriɣ tadla n tmdyazin inu izwarn lli mmu stiɣ assaɣ n Aẓawan n urmmaḍ ɣ usggʷas n 2009 iḍfr tt id wayyaḍ ɣ usggʷas n 2010 lli igan s wassaɣ Tandra n ifssi llis umẓɣ tasmɣurt tanamurt n tskla n Usinag Agldan n Tussna Tamaziɣt ɣ usggʷas-ann ilal-d ilmma udlis inu wiss kkuẓ lli druɣ d umara amqqarn Σyad Alaḥyan lli mmu nsti assaɣ n Azwag gr tguriwin lli igan tirmit tamzwarut ɣ unamur nnɣ. Adlis-ad iga tamdyazt s tɣarast n umsiwal, iga tibratin n umarg. Stiɣ nkki ad ttaraɣ anaw-ad n tmdyazt amaynu mqqar a ttaraɣ aqqbur, macc anaw n tmdyazt tatrart aɣ bahra ttafaɣ ixf inu acku ar gis tddrɣ s tlilli. Ar gis gʷnnaɣ i tguri ifugga, sslsɣ as gis iqqcban s ikʷlan n tfsut lli d ttagʷmɣ ɣ umawal n tutlayt nnɣ izdgn. Ur bahra ḥmlɣ iskraf. May-ann ad iyi yujjan ad bahra ur ttaraɣ tamdyazt taqqburt lli aɣ kkrfn isaffn d tɣarast-ad tzḍaṛt ad gis tsgrawlt aswingm, tsgrawlt gis inumak, tfkt tasit tibratin idran mqqar asnt sslsaɣ tawlaft lli ittcqqun f imɣri kra n twal ad tnt inn yagʷz. Macc imɣri amassan d umɣnas ar ilkkm ad irms tabratt, iddr assyafa lli tusi tmdyazt.

 Ar bahra ttarat amareg d temdyazt, is d urjjunn-turemt anawen yaḍnin n teksla?

Mqqar bahra ttussanɣ s tmdyazt macc idrus mad issn is d arraw inu amzwaru ɣ tskla tgat tullist. D ar ttarraɣ awd ungal. Ssntiɣ ura ar swingimɣ ad araɣ asenariu. Tili dar-i tswingmt ad armɣ asuɣl, ilin dar-i kigan n turarin n wazzan iɣ illa mad ittawsn. Ar ssitimɣ ad d-lalant, lkmnt azzan.

 Is dar-m kra n iṣnfaṛen ɣ mad nn ur yaggugn ?

Dar-i mnnaw iṣnfaṛn. Amzwaru gisn, asggʷas-ad nit, rad ssfaɣ tadla tamaynut lli rad ssuɣlɣ s tutlayt n taɛrabt d tutlayt n tfransist a fadd ad tlkm tskla nnɣ amaḍal, ili dar-i yan ungal inu d yan ungal akurdi lli swingimɣ ad as skrɣ asuɣl s Tmaziɣt.

Manikk  as a ttannayt addad n teskla n Tmaziɣt ?

Taskla Tamaziɣt tlla ukan sul ɣ waddad n uṛmmaḍ, tili gr uzrg n ummukris n tirra d win ussufɣ d win tɣri. Ili walli akkʷ imqqurn a tt igan d usnaḥya lli s a ssyafan imaratn amnid n imaratn n tutlayyin yaḍn ɣ twisi n tmawasin ula tismɣurin tinamurin lliɣ bdda ur tlli Tmaziɣt.

Is g-is illa mmel (adɣar) n temṭṭuḍt nɣdd wahli ?

Tamɣart  Tamaziɣt  tga  bdda  lal n usnflul. Zzeɣ  taɣrma  tamzwarut  n Imaziɣn  mqqar  as tt  ur  tskar s ufrak n usnflul. Ar   tt  tskar s ufark n twwuri   lli  izdin d tudrt nns. Takuyast d nttat   ad  yujjan   iskklin  nnɣ   ad   iddr  ar ass-ad. Manik ad gis ur ili  udɣar   ns nttat  ad  akkʷ  yusin  tasafut  nns, tasi  tayri  nns, macc  nssitm   ɣ  Tmaziɣin n wass-ad ad asint  anaẓar afadd   ad  sfalkint   udm n tskla   amk-lli   sfulkint   udmawn n tudrt   nsnt. Tamaziɣt  tlla s isti-s. Ilint  ɣil-ad tmaratin   lli   ddar   tiziḍaṛ   ad   fkint   i  twssna Tamaziɣt   idammn  slawan   akkʷ  iɣ  nssn is tella Tmaziɣt   ɣ tinml d  tsdawit. May-ann   lli rad tnt   yajj  ad  sfalkin   tutlayt, mmaɣnt ad tg tad izgn,  lmdnt gis tirsal n tirra mk-lli s d-iqqan mqqar may-ann ar isɣawsa s ufrak zwar macc awd tinml iɣ nlmd tirsal ns ɣ tinmlt may-ann rad bahra isfalki imal n tskla tamaziɣt.  Ifl aɣ d tasutin  lli rad  iẓḍiṛ ad sslkmnt tirra s tmaziɣt i umaḍal .


Tazult tumlilt

Σica, tga yat tmɣart bahra ifulkin, tkka-tt-inn  lliɣ tmẓẓi ar tkssa wulli n baba-s. Tayssa-ad tfka as tazmrt iggutn. Lliɣ dar-s sin d mraw n usggʷas, yiwi tt baba-s dar yat tuwja ɣ Ugadir ar dar-sn tswwuri ɣ ugns n tgmmi.

Mac Σica s ufulki nns lli as ikfa Ṛbbi, tiwallin mqqurnin, timiwa ẓilnin, tawnza iɣʷman, timimmit izggʷaɣn, tifassin ṛcmnin. Tiwi kullu adwal n inggʷa nns g tmazirt ula wili tt ugrnin s imik. Lliɣ tkka smmus isggʷasn ɣ Ugadir irna bahra ufulki nns, fawn d tfras nns, tg tanirt isnufuln iɛrrimn ula tirbatin. Tga titrit issufun iḍ d uzal.

Ku tafaska ar d-ttacka s iɣrm n Tumlilt dar tuwja nns, ar gis tzzray yan mnnaw ussan. Kud yan ar ittɣawal ad dis isawl, nɣd as tt inn ka iẓṛ. Σicha ar d-tgga tarbit ibuɣlan s ufulki, ar tssfsay ulawn tbri tiswin. S mk-lli s a tfalkay ar itiẓiy unlli nns, ur tfssus ula tra ad tssigut awal d trbatin ula irban.

Iɛrrimn n Tumlilt ula tarwa n tuwja nns, kud yan ar ittwarga ad ig isli n Σica, illa mad akkʷ yiwin asiggl zund Mḥnd lli igan aslmad g tinml n iɣrm. Mqqar ira baba-s ad as tt issiwl ad sul ur tiwrri s Ugadir ad tswwuri dar mddn, mac nttat tsslkm i mas masd iwil ur t tra ula ar gis tswingim ɣ akud-ann.

Sɣ mk-ad as tzzri Σica tiɛurma nns izwarn, ar tswwuri dar tuwja yan g Ugadir tzmr igagan f kigan. Tawja-ad lli dar tswwuri, argaz iga lmuhandiz, tamɣart nns tga taṭbibt, mqqar ur tsɣawsa s umya, d ar ttazn i baba-s idrimn, macc ur tra ad tg tanawurt n unwal dar wiyyaḍ. Tẓẓiḍṛ acku tra ad taws i baba-s d mas lli ganin imẓlaḍ g tmazirt.

Lliɣ dar-s llan simraw d sin n usggʷas tiwl yan uṛumi iga amdakkʷl n lmuhandiz, tskr tamɣra mẓẓin g tgmmi nns g Trudant. Tg Σica tamɣart illan d ixf nns. Tzdɣ g taddart mqqurn iṭṭafn turtit nns. Aṛumi-ad dar-s mnnawt n tebḥirin g tsggiwin n Hwwara. Ur tettu baba-s ula ma-s ula aytma-s, tskr asn tigmmi tamaynut g tmazirt, d yat yaḍnin g tmdint. Tskr Σica ttamubil ar d-tacka s dar tuwja nns g iɣrm n Tumlilt, mk-lli d tawi kigan n trggalin i tmɣarin d trbatin tinaragin nns.

Tswingm Σica ad taws i tmɣarin n Tumlilit ad aqqrant, ssinfnt taɛamit. Tddu s dar umɣar tnna as t. Amɣar inna t i lqqayd. Lqqayd tssusmt tswingmt, yazn asnt taslmadt ad tssaqqra timɣarin.
Tinml n tbadt ur gis adɣar ma ɣ ttilint tmɣarin. Inna asnt Lqqayd ad aqqrant g tmzgida. Tssnti tɣri imalass izwarn, timɣarin ar d akkʷ tackant, sɣint idlisn, ar gʷmmint iskkiln d tguriwin. Tifawin n wass ar swurrint g tdrwin, tidggatin ar d-ttackant s tmzgida ad lmdnt.

Izri imalass izwarn s mk-ad, irgazn n iɣrm ur tn issusm may-ad, “timɣarin ad aqqrant”. Ay-lli jju ur ijṛin. Nkrn skrn agraw lliɣ ẓẓuln tiwwutci, ffɣn ad gin ttmi i turmit-ad. Snfln asad n tmzgida rgln t, azn s umɣar nnan as :”timɣarin iḥṛm ad kcmnt s tmzgida”.

Tbidd tɣri n tmɣarin, ibbi uzmumg g imawn n tmɣarin, ibidd unaruz g ulawn nnsnt. Ssyafant s tḥggaṛt d gar. Lkmn inɣmisn Σica tmun d urgaz nns aṛumi. Tskr mnnaw igrawn d irgazn n Tumlilt afad ad ṛẓmn timzgida mnid n tmɣarin nnsn. Mac ur tlkm awttas nns. Yan wawal ad mu ttalsn irgazn, “ timɣarin iḥṛm ad kcmnt s tmzgida”.

Σica d urgaz nns, sɣan akal g iɣrm n Tumlilt a gis skrn yan uṣayṛuṛ i tmɣarin ad gis aqqrant d ad gis lmdnt tuhgt n tuwwriwin n ufus.


Σbdellah Buccṭaṛt

lundi 23 février 2015

Taskla Tamaziɣt : ingr unzgum n tnawayt n tutlayt d uḥṭṭu n tẓlayin.



Kigan n tutlayin n umaḍal ttusmsasant g tasut tiss 20, am tutlayt n Kaṭalanya d tutlayt n Kursika d tutlayt Flaman d tfṛansist n Kibik...tawwuri ad ittugan tsgula tutlayin ad kullu tnt i yat tizi g mi ẓḍaṛnt ad mmuttint zg waddad aminaw ɣr waddad amiray, llant digsnt tutlayin nna mi ittzizwir tskla nnsnt akkʷ d tskla n tutlayin timarayin tiqqburin.

Nlla nssn ma tta tizi tiwḍ tutlayt n Flaman mqqar ur ttusmsasa al tasut 20, maca taskla nns tzmar ad tṭṭaf tuggt n tsmɣurin n umaḍal. Taɣuri n tbrdin nna ḍfṛnt tutlayin ad, iga yat tsurift tadslant mac nra ad nslkm tutlayt Tamaziɣt i uswir lli g nennurz d lli ar tgannayn Imaziɣn d willi g tlla tɣufi n Tmaziɣt s umata.

Zg iskkin iqqan ad gin imrsi n tɣuri tamassant, ar ntafa amyassa ingr tanawayt n tutlayt d uḥṭṭu n tẓlayin tidɣarin n wansiwn g mi ttusawal tutlayt nna.

Da ttinin imsnilsn d imrza mas d tnawayt n tutlayt tga yat tmhlt tatiqnit iwhn, maca azzigz nns ar ittettr tuggaz imqqurn, iddɣ tutlayt ur tgi ɣas tin waḍu nns, tga tugilt s yigran wiyyaḍ am tskla d tdlsa d umzruy d uwngm...ku tutlayt ɣurs azday nttat d igran nna. S uynna, ur iɣi awd yan ad yini is tnḍu tutlayt ɣr addad amiray adday ur tnḍiw tskla awd nttat zg uswir n tskla tmraran ilsawn ɣr tskla ittusmun ingr tsnatin n idlisn.

Asiwl xf tnflit n tskla tamaziɣt g umyassa nns akkʷ d tnawayt n tutlayt ɣurs sin n udman. Udm amzgaru izdi ɣr tmamkt nna s nẓḍaṛ ad nssaɣ taskla itturmasn zg ma ayd igan imsiwln Imaziɣn, udm wis sin yiwi d xf tɣarast nna ɣa nskcm tiẓlayin n ku ils adɣaran g tskla tussiɣt ismunn tintalin bla ad ig uynna yan udṛṛaṣ ittgdln amsawaḍ d urmas n ma ayd itturan g tmnaḍin Umurukuc.

Am uynna nssn, taskla tga yat zg tlɣiwin s mi issikiz ufgan ifrayn d iswingimn d inzgumn nna as illan g ul, s usmras n cigan n tbrdin, zg digsnt tirra n tariwant, n tmdyazin, n tnqqisin, n ungal, s umata, ur nɣi ad nsyafa taskla iɣ ur tlli tutlayt. G unaw n tutlayin isul ur ilkimn tizi n waddad amiray, ar ittusrus usqsi xf mata tutlayt s mi idda umsnfl ad yara? Id ad yara s ils adɣaran n wansa g iddr? Id ad yara s tutlayt tanawayt bla tiẓlayin n ku adɣar?

Tamrarut xf isqqsitn am wi, ar nnzɣn imrza ɣr tɣuri n tusurt n usmsasa n tutlayt Tamaziɣt xf tnflit d tudrt n tskla. Imsnilsn d imɣnas ɣursn anzgum n ussaɣ d usmun n tutlayt tamaziɣt, digsn taɣufi n ummuti zg tutlayt ittubḍan, igan tintalin ittusawaln g tmnaḍin n tmazirt, ɣr yat tutlayt tanawayt ismun ilsawn Imaziɣn qaḥ, maca awaḍ s uwttas-ad ur ixṣṣ ad ittu addad n tskla.

Adday nini armmus n tskla, hatin da ntsawal xf iwnnint ɣr llatn tmitar g wamun, ar ntsawal xf tmssinit n iwaliwn, xf tsuɣal tamunin d tdlsanin, xf tamamkt n wannay n wamun i tudrt d tmagit. S tlusi, taskla tga yat tisit issaɣul anawn n uswingm n iwdan n wamun. Ku taskla ar ttuɣma s tẓlayin tidɣarin n tgawt n midn ar tt ittsyafan, awd tutlayt igan imis n iwnnit n tskla, ar ttasi tiẓlayin n ku ansa, aynna as ur iɣi yan Umaziɣ izdɣn g Fazaz ad irms kra n izlan nɣd timdyazin n Urif, awd Amaziɣ n Sus ur izmar kra n tikal ad yakz xf mi isawal umdyaz n Fazaz. 

Illa umzaray g tskla zg udɣar ɣr adɣar wayyaḍ, yili umzaray asnils ingr tntalin n Tmaziɣt, illa umzray awd jaj n yat tntla, addad ad iga agaman g ku tutlayin nna illan g tsurift n ummuti ɣr addad amiray.
 Asnyuddu n tamant ad iqqan ad ittuga g sin ibrdan:
-Tamrniwt n unaway asklan iccarn ingr tintalin s kṛaḍt.
-Aḥṭṭu n tiẓlayin tidɣarin n ku ils.

Tawwuri am ta ar ttiri asɣiws n tsratijit tanafawt n imal ittuskan xf tirsal idusn, ar ttiri tasrtit g ɣa yammu imaratn d imsnfal d imsyafatn d imzzigzn d tmsmunin d imrza d imuzay, ku yan ɣurs tawuri d tilalt nns, ku yan iṭṭay tannayt nns, ku yan zg udɣar g mi illa. Amara nta iqqan ad iṭṭaf afrak n tmuzɣa d usnti n ussaɣ d tnawayt n tutlayt d tskla tamaziɣt, iqqan ad ur ittara ɣas s ils adɣaran nns, g wansa n uynna, ixṣṣ ad ig tamssumant afad ad ittara s ilsawn wiyyaḍ n Tmaziɣt, iqqan ad iṛẓm uɣanib nns xf tntalin s kṛaḍt.

Zg tsga nnsnt, timsmunin ɣursnt tilalt tasgumant g tflit n tskla tamaziɣt s usɣima n tinawin d inmuggar d twila n usmuttg g ɣa tsmun imaratn d imdyazn afad tn tssfrk, tsnmala asn taɣarast ɣa ḍfṛn g tirra n idlisn nna ssufuɣn.

Awd asinag agldan n tdlsa Tamaziɣt ila yat tilalt takswat g tɣawsa ad. Iqqan ad isrqb winna ittaran taskla s tutlayt tanawayt, ar issufuɣ ku tiklt tismɣurin, ad issufuɣ amanar ɣa ssikizn tamamkt s ɣa ttyari tskla Tamaziɣt.