Izenẓaren ḍin-d amaynu

Sin ignaren n ussggwass  ghzzifnin ay-ad ad ur tesffagh terabbut ittubdarn n Izenzaren kra n tessfift ka. Macc ussan-ad, tedi-d yan w album amaynu lli rad dagh issusm amarayen n tezenzart inna gh llan. Yat ukan, inna tekkit gh Suss ura berra nes ur rad d-ttawin imzgan ghar azawan nes.

Tawwuri-ad  d-iggwran lli mu ssaghen ‘’akal’’ llant gis sdist tallghatin. Akal nit, tifawt, tinmel, asgmmi d inmateren.


Ad nesskwti i imghera masdd Dda Lahsen Bu-ufertel, bu-tam-tam bahra mqqurn n terabbut-ad negh, is ur idder ar kigh izer ufugh n tayafut-ad. Yiwi t Rebbi s dar-s ndadana.  Ad as izwiren imula ggrun as !

Amrakkwc: Amsiwal n iḍerḍar

*** Awal fw awal***

Ussan-ad, medden ur ar sul sawalen ghar f Tebaɛmrant lli iskern yan uzeruy[1] gh unfalis[2] n Lmxzen. Maxx ? Acku tesawel s temazight nghedd kra mad s tt irwasn –tektart s teguriwin n teɛrabt. Yat teghawsa ukan, Tabaɛmrant tessrqeb, tili tagizult, ur nn-tekesa i kensis. Meqqar akkw as ssutlen mad iggutn n ighnan.

Ma rad awen inigh ? Gh umnid inu, ur ssenegh izd ad allagh idammen nghedd mit, acku isiwel n temazight ixassa yad-lli ad ikk afella[3], ad t jju ur ikcwced uzmez. Acku tutlayt tamazight, ur tt id nikerr gh iming ura tagut, tega tinnegh, teg tin w akal-ad negh. Macc lmxzen bu-tillas ilkem gh ay-lli ira : isker gis tabrrant gh temazirt nes, ar tt ittay zund igh t tega timikert.

Mnnaw n iyyiren ay-ad urigh, inigh masdd assnseb lli isker n unagraw aɛrubi izqqaqn n Rbad i temazight ur tt inn kka, ura rad s tt inn ikk. Acku issuda f tekerkas d tettennazt. Ur ibidd f kra nw akal idusn. Tawkkast[4] nw awal negh gh unfalis nes, lligh tumez Tebaɛmrant awal, tega tamatert izzighwzin ay-lli s yad nnigh.

Ma za igan ijji n ummukris-ad negh? Ixassa agh ad nemmagh ad neg idrfay gh temizar negh, najj i lmxzen anfalis nes, ura anwnek nes, ura anufl nes. Igh nera ad nili sw addur d temuli iqqan agh d ad neg win iguyya negh. Ad sul nagwel gh yan ura igwel gigh yan. Tamazight d timmuzgha ur sar tent ira Lmxzen acku ar as d sskwtayent is iga abrran ghw akal negh.

---

[1] Événement.

[2] Parlement.

[3] Va de soi.

[4] Interdiction.